15 oct. 2018

COMUNICADO DE CORRECCIÓN DE CLASIFICACIÓN TRAIL CURTA

Comunicado en relación coa clasificación Trail Curta Categoría Veteranos Masculino.

Queremos informar que nas clasificacións desta categoría tivo lugar un error de tipo técnico que fixo que o primeiro listado de clasificados en Trail Curta Categoría Veteranos Masculino, e que foi o empregado para entrega de premios, non se correspondese co que finalmente se publicou no blog de Montes de Vigo.

Este error, recoñecido oficialmente pola empresa contratada para o control de tempos, veu derivado de “una anomalía en la asignación de categoría de los afectados”, que foi a que fixo que os tres primeiros clasificados finalmente publicados no blog non estiveran incorporados como veteranos no momento de xerar o listado empregado polo speaker para comunicar os gañadores en podium.

Evidentemente, este error, alleo por completo a Montes de Vigo, modifica os resultados tal e como se reflicte de seguido:

RESULTADOS DE PODIUM (ERRÓNEOS):
1. Gonzalo Comesaña Estevez (2122)... 01:30:14
2. Javier Mariño Rodríguez (2105)... 01:37:59
3. Diego José Pío Vaquero (2037)... 01:39:24

RESULTADO FINAL PUBLICADO (UNHA VEZ CORREXIDAS AS DATAS DE NACEMENTO)
1. José Soto Sanromán (2094) ... 01:19:45
2. Rubén Sio Fernández (2059) ... 01:25:54
3. Pepín Bernárdez Rodríguez (2104) ... 01:28:49

Como organización da Trail Curta Montes de Vigo queremos pedir públicamente desculpas por esta indesexada situación e agradecer a comprensión dos implicados.
Vigo, 15 de outubro de 2018

14 oct. 2018

INTENSA XORNADA NA TRAIL E ANDAINA ORGANIZADA POR MONTES DE VIGO



Neste domingo 14 de outubro de 2018 rememorouse o 1º ano de rexeneración dos montes de Vigo tras os desgraciados incendios de vai un ano. Facía precisamente un ano que tivera lugar a IV Trail Montes de Vigo e por tal motivo había que realizar a V Trail Montes de Vigo. Tamén se organizaba a I Andaina pola rexeneración dos montes de Vigo, coa participación do programa Camiño a Camiño do Concello de Vigo. 

En total máis de 500 persoas gozaron do monte nas distintas modalidades: Trail, Trail curta, Carreira Popular e Andaina. 

Despois dunha noite cos restos do furacán, semellaba que non se ían cumprir as previsións de un día fermoso. Ao final sí que se cumpriron e disfrutouse dun monte expléndido para a práctica deportiva e para ver como pouco a pouco vai recuperando a súa normalidade, anque aínda queda moito traballo por facer por parte das Comunidades de Montes e moito traballo de colaboración entre Montes de Vigo e institucións públicas competentes.



No acto estivo presente o Alcalde de Vigo, Abel Caballero, que coa súa presenza quixo compartir cos directivos das Comunidades de montes presentes o seu firme propósito de contribuír á rexeneración e ordenación do territorio.

Por outra banda, dende a organización agradécese o patrocinio de Concello de Vigo, Coca-Cola e Decathlon, así como a colaboración de Vigo Entrena, Massini, Inquedanzas Sonoras, Estrella Galicia, Master Hermida, Coruxo FC e a Comunidade de Montes de Coruxo. 

Tamén agradecer a desinteresada colaboración de 66 comuneiros procedentes das comunidades de montes de Beade, Cabral, Comesaña, CoruxoMatamá, Oia, Saiáns e Valladares, así como a colaboración do Club Ciclista Coruxo e persoas a título particular.



Resultados deportivos
As probas realizáronse con normalidade e en xeral con moi boas sensacións. 

Os resultados preséntanse no seguinte enlace (PREMER)

Cómpre sinalar que houbo algún problema de tipo organizativo-deportivo que se solucionaron en directo coa colaboración das partes implicadas. En particular houbo unha incorrecta interpretación do regulamento ao aplicalo informáticamente que fixo que a segunda clasificada na Trail non subira ao podium, subindo a terceira no seu lugar. Volvemos a solicitar desculpas, esta vez públicamente, e o corriximos nos resultados colgados.



Agardamos que todos/as os/as participantes vos sentísedes na vosa casa e tiverades unha agradable participación nas probas. Felicitamos particularmente aos gañadores nas distintas probas e modalidades, así como aos que nos sorteos recibírades un apetitoso agasallo. Agardámosvos en vindeiras edicións.

As fotografías do evento xa están dispoñibles neste enlace (PREMER)

Breve video das actividades:


10 oct. 2018

PRIMEIRA SEMANA DE ACTIVIDADES: CONFERENCIA E ARTE NO QUEIMADO


Nesta primeira semana de outubro arrancou a programación de actos "1º ano rexenerando os Montes de Vigo", coa que se quere lembrar os acontecementos vividos en outubro de 2017 e dar a coñecer as accións que dende as Comunidades de Montes de Vigo se teñen levado a cabo.

A programación foi presentada polo Alcalde de Vigo, Abel Caballero, xunto ao Presidente e Vicepresidente de Montes de Vigo. Con tal motivo houbo ocasión de repasar o programa de actos e dar a coñecer os avances que se están dando na elaboración da Senda Verde que atravesa o conxunto de montes periurbanos de Vigo, así como o apoio no coidado do monte e a limpeza dos terreos privados.

O detalle da programación atópase recollido na seguinte entrada (PREMER)



O mércores 3 de outubro tivo lugar a conferencia no Club Faro de Vigo baixo o título "Que aprendemos nos incendios de outubro de 2017?" e a cargo de Juan Pico, director da Escola de Enxeñería Forestal de Pontevedra. Resultou moi ilustradora do traballo de investigación que se está a facer a partir dos incendios vividos e apoiado pola Deputación de Pontevedra. 

Un resume da exposición queda recollida no xornal (PREMER), na que queda de manifesto a importancia de traballar dende o primeiro momento para organizar e planificar a xestión do monte e das infraestructuras asociadas ao mesmo para evitar que volva a repetirse unha situación como a vivida, dado que "os incendios teñen memoria".

O sábado 6 de outubro tivo lugar a Xornada artística de pintura e escultura en madeira "Arte en vivo, Arte no queimado" diante do Marco. Un nutrido grupo de artistas participaron na xornada, dando unha auténtica exhibición diante da cidadanía paseante pola rúa do Príncipe. Unha reportaxe do traballo realizado atópase no seguinte album fotográfico (PREMER), mostrando de seguido algunhas das instantáneas vividas.