No día de hoxe a Directiva de Montes de Vigo, co seu presidente Uxío González á cabeza, presentou as súas demandas aos candidatos autonómicos do BNG por Pontevedra: Luis Bará e Alexandra Fernández, recollidas no documento que se adxunta AQUI. No acto tamén estiveron presente representantes de Comunidades de Montes da Área Metropolitana de Vigo.
No intercambio de pareceres púxose de manifesto a necesidade dun apoio decidido por parte da Xunta de Galicia ás Comunidades de Montes como axentes dinamizadores do territorio e, no caso das de Vigo, dinamizadores do uso social do monte. Para ilo proponse a definición de estratexias encamiñadas á implantación de infraestructuras verdes provedoras de servizos ecosistémicos á sociedade, coa correspondente compensacións acordes coas necesidades do século XXI e coa definición de normativas que protexan a conservación de espazos necesarios para o benestar da poboación sobre a base dunha xestión directa.
Tamén se ve necesario abordar unha política de prevención dos grandes lumes que aborden as problemáticas existentes de xeito urxente, a saber: enclaves privados abandonados a carón dos montes comunais xestionados, definición de franxas de defensa pasiva nas partes altas dos montes e establecemento dun cinto verde na proximidade das vivendas. Para isto cómpre determinación por parte dos responsables da xestión autonómica, así como a necesaria coordinación coa administración local para que máis pronto que tarde se implanten as medidas e se estea en condicións de evitar unha previsible nova vaga de lumes como as de 2017.
Por parte de Luis Bará valororáronse as propostas efectuadas ao ser específicas duns montes cunha gran presión social e cunhas características que requiren un tratamento diferencial por parte da Administración autonómica, máis incisivas do actualmente existente e cunha clara vocación social.
