No día de hoxe a Directiva de Montes de Vigo, co seu presidente Uxío González á cabeza, presentou as súas demandas ao candidato autonómico de Sumar Galicia por Pontevedra: Ramón Sarmiento, recollidas no documento que se adxunta AQUI. No acto tamén estiveron presente representantes da Comunidade de Montes de Tameiga.
Na xuntanza puxéronse de manifesto as particularidades das Comunidades de Montes Veciñais en Man Común, como unha forma de organización da propiedade da terra colectiva na que se busca atender as necesidades da veciñanza e ao mesmo tempo preservar a continuidade no tempo.
Estívose de acordo en que esta realidade, no caso do monte periurbano como o de Vigo, require un tratamento específico por parte da administración autonómica no que se recoñeza e se colabore con políticas ad-hoc na medida que proporciona servizos ecosistémicos a máis de 300,000 persoas e serve de transición para a defensa de grandes lumes como os que se están vivindo nestes momentos en Chile.
Por outra banda, tamén se tratou da importancia que teñen as Comunidades de Montes na transición enerxética que se está a vivir e como é preciso apoiar iniciativas como as comunidades enerxéticas que requiren de superficies colectivas para abordar estes proxectos con seguridade xurídica.
Para rematar, viuse a necesidade de que haxa unha comunicación máis intensa das formacións políticas co movemento de comunidades de montes veciñais en común para así despexar pantasmas que se están a atribuír por partes interesadas recén chegadas á "usurpación" da terra, que en Galicia supón máis dun terzo. Resultou moi interesante a posta en común realizada.
